بالنسبة للفئة التي لا تستطيع أن ترى خطورة خطاب بوحليق لي معنداش مشكلة مع التبو الليبيين أو لي تشوف في خطابه عادي وصحيح
هو صح معنداش مشكلة مع التبو الليبيين،
بس يشوف إن ربيانة، لي فيها آلاف التبو الليبيين، مافيهاش ليبي غير أربع عائلات من قبيلته هو.
هو معنداش مشكلة مع التبو الليبيين،
بس يشوف إن وزراء التبو مش ليبيين، و يتهم إن واحد منهم معنداش رقم وطني.
هو معنداش مشكلة مع التبو الليبيين،
بس يرفض احتفال التبو الليبيين بيوم الثقافة التباوية.
معنداش مشكلة مع التبو الليبيين،
بس يشوف في باباي إنكازي، الليبي، تشادي ومش ليبي.
هو معنداش مشكلة مع التبو الليبيين،
بس يرفض إعمار مناطق التبو لانه يشوف فيهم مش تبو ليبيين.
هو معنداش مشكلة مع التبو الليبيين،
بس لما يتعيّن وزير تباوي، ما يقدرش يرقد الليل.
معنداش مشكلة مع التبو الليبيين،
بس يوصفهم بـ«المعبدة».
معنداش مشكلة مع التبو الليبيين،
بس أول ما يطالبوا بحقوقهم، أو يدافعوا عن نفسهم يطلعوا تشاديين.
هو معنداش مشكلة مع التبو الليبيين،
بس كل تباوي مات في حرب قبلية "تشادي"
وزيرة الثقافة؟ تشادية.
وزير الهجرة؟ تشادي.
الوزير التباوي؟ مش ليبي.
التباوي لي يطالب بحقه؟ تشادي.
التباوي لي يدافع عن نفسه؟ تشادي.
التباوي لي مات في الحرب؟ تشادي.
الشماعة بدت مستهلكة.
جملة "التبو الليبيين معندناش مشكلة معاهم" أصبحت جملة جاهزة يستخدمها كل من يريد تمرير خطاب الكراهية أو العنصرية ثم يضع كلمة «ليبيين» في بداية الجملة حتى يعطي نفسه غطاءً أخلاقيًا.
بس من هم التبو الليبيون الذين لا مشكلة معهم؟
التباوي الذي يسكت؟
التباوي الذي لا يطالب بحقه؟
التباوي الذي لا يدافع عن نفسه؟
التباوي الذي لا يحتفل بثقافته؟
التباوي الذي لا يتولى منصبًا؟
التباوي الذي لا يطالب بإعمار منطقته؟
لأن أول ما يخرج التباوي من هذا الدور تبدأ الاسطوانه المستهلكة نفسها "تشاديين "
الجملة لم تعد تبرر شيئًا....كل من يتحدث بلا دليل ملزم أن يأتي بدليله أما نحن غير ملزمين الا بالمطالبة بمساءلته.
