فيه شاب ليبي اسمه عامر، كان رايح المطار عشان يسافر السعودية للحج، وأول ما وصل لقوا مشكلة أمنية في اسمه، الأمن قالوله "استنى شوية هنحاول نحلها"، وفي الوقت ده كل الحجاج خلصوا إجراءاتهم وركبوا الطيارة، والباب اتقفل، وبعد ما اتحلت مشكلته، الطيار رفض يفتح باب الطيارة والطيارة اتحركت من غيره..
ظابط الأمن قاله: "متزعلش، يمكن مش مكتوبالك، ماتقسمتش ليك." لكن عامر رفض يمشي من المطار..
وفجأة جالهم بلاغ إن الطيارة فيها عطل وراجعة تاني!
رجعت الطيارة واتعملها صيانة، وبردو الطيار رفض يفتح الباب لعامر.. الظابط قاله تاني: "مش مكتوبالك"، عامر رد: "النية حج، وإن شاء الله هروح".
الطيارة طارت تاني، وبعد شوية، بلاغ تاني إنها حصل فيها عطل ورجعت! وساعتها الطيار قال: "مش هطير إلا لما عامر يركب".. عامر عمل ڤيديو من مطار السعودية وهو مبسوط جدا وطاير من الفرحة إنه وصل..
قيل في معنى اسم الله (القهّار) إنه بيقهر الأسباب لأجلك، ربنا قادر يرزقك ويقهر لك الدنيا بحالها عشان يراضيك!
مهما الواحد كان شايف الموضوع صعب ومعقّد ومالوش مَخرج وأبوابه مقفّلة قادر ربنا يقهرله الأسباب والدنيا كلها لأجله فقط، لأجل الموضوع يتم ويتيسر، فَماتشغلش بالك وتقعد تفكر وتدبر وتخطط وتسأل نفسك مليون ازاي وامتى .. طول ما انت عندك يقين إن "ربنا قادر" صدقني هيغيّر موازين كتير أوي عشان خاطرك. ♥️
