لما يقولك انا عايش وسط شعب مصاب بانفصام فى الشخصية...؟===================================
تمشي للجامع تلقاه معبأ ( فُلّ ) ،
تعطس في مجمع كلّها تقولك ( يرحمك الله ) ،
توقف في سيمافرو متسمعش إلّا السديسي ومحمد ايوب وعلى عبدالله جابر والدوكالي والأركاني وعمر عبدالكافي ومحمد راتب النابلسي والشعراوي وصالح الفوزان واللحيدان وقائمة لا تنتهي من مشائخ سعوديين ويمنيين وحتى من دارفور وكسلا وخرطوم بحري وما جاورها ،
تمشي لعزاء تعيا من السلام وكلُها تحكي ع الميت وكأنّه أبو ذَر ،
ووقت الآذان متقدرش تسمع اللي حداك شني يحكي من كثرة الجوامع والميكروفونات ،
ووقت الصلاة متفكرش تمشي من شارع قدام جامع اللي في سيارة ينقز منها وع الجامع جري ،
واللي يعطيك موعد ( بعد العصر ) ( قبل المغرب ) ( قيس صلاة العشاء ) ،
واللي يهدرز ( والله من صلاة الفجر معاش نرقد ) ( ناخذ في غفوة قبل العصر ) ( أنا نصلي العشاء ونرقد )
تمشي بتزور مريض في مستشفى تبي نص نهار باش توصل فيه والمحطات متاع المستشفى جمام بدعوى زيارة المريض ،
ولو شافو ظلم كلّها ( حسبى الله ونعم الوكيل ) ( وربي يأخذ الحق ) ( ويلقاه ويتلقاه )
نغمات التلفونات تكبير وأدعية وصلوات
وكان درت حادت كلها ( قضاء وقدر )
يخشو الجوامع باليمين ويطلعو باليسار ويتخطّو في الرقاب باش يوصلو في الصف الأول
ينكرو في الحجاج ويدّاعكو ع العمرة ويا سعد من يسكن في أبراج الصفوة والمروة....
باهى أمألألألألألألألألألألألألألألألألألألألألألألألألألألألألألألألألألألأ
امّال منو يهرّب في الوقود
والهجرة غير الشرعية
منو اللي يتعامل بالربا ويبيع بالشيكات المصدقة بأسعار مضاعفة ؟
منو اللي يقتل
ويسرق
ويخطف
ويذبح
ويشرِّد في العباد ؟
وفي آخر الفيلم يقول ( منصورين إن شاء الله )
منو اللي ميخلصش في الضي ولا اللميّة ؟
منو اللي يدس في الحليب باش يبيعه بالغلاء والكواء في رمضان ؟
منو اللي يغش في الإمتحانات ؟
منو اللي يعيّن بالواسطة ؟
منو اللي يفسد في أجهزة المستشفيات باش الناس تصب عنده ؟
منو اللي يصطاد في المرضى ويحوّل فيهم ع المصحة اللي يخدم فيها ؟
منو اللي لاعب في فلوس النفط والغاز والإتصالات ؟
منو اللي يدلّ ف الناس في طوابير المصارف ؟
منو اللي يقص في الضي بيش يبع المولدات ؟
منو اللي مخلّي الغاز والبنزينة والفلوس بالطابور ؟
منو اللي خلَّى الحليب يعطوا فيه بالأربع باكوات والتن بالخمس حكاك والدواء بحّة ؟
منو الله خلَّى سعر الباندول يدير الصداع ؟
منو اللي خلَّى المستشفيات زي الورش - منك المعدات ومنهم اليد العاملة - ؟
منو اللي خلَّى شوارعنا كنايس وحال العباد حايس وكان صبّح الصبح يلحقه الليل بايس
اللي دار هدا كلّه ليبي...ويقولك ربى يهدى العباد وكان الكلام هذا مليش علاقة ؟
وانا اللي كتبت هذه الكلام راهو زيكم ..مصاب بانفصام في الشخصية ولكنه من النوع الحميد..
