-----------------------------------------
كانت هانية متهنية تقدر تعيش ب 120 جنيه وتقدر تعيش ب 1000 جنيه ..
الليبيين كيف بَعضُنَا ....انتغدوا كسكسي والا بازين ونتعشوا خبزه وطبيخة على خفيف ونشربوا فى الشاهى الأخضر والا الأحمر ..
الليبيين كيف بَعضُنَا.... زى اللى يسكن فى فيلا ... وزى اللى يسكن فى خيمة يحبوا يرقدوا على الاوطى وعلى مندار ويتوسدوا عقاب اوساده....
الليبيين كيف بَعضُنَا ...زى اللى يدخن رياضى وزى اللى يدخن مارلبوروا مشكلتنا وحدة مش عاجبنا شىء....؟
الليبين كيف بعضنا ....زى الوزير وزى الغفير ، ناخدوا فى كل مصروفنا من الجمعية كل شهر وكان نقص شىء نبدوا نسبوا؟
الليبين كيف بعضنا ....زى الغنى وزى الفقير فى الافراح وحتى فى المآتم انيدروا خيمة فى رأس الشارع ونستقبلوا فيها من المسؤل الى المواطن العادى ...؟
الليبين كيف بعضنا ...زى الدكتور وزى الراعى فى الصحراء معاك ...معاك لين تختلف انت واياه معادش يسلم عليك؟
الليبين زى بعضنا ...زى المثقف زى الجاهل كان عنده قداك مصلحة يبتسملك ويسلم بالحضان وكان معنداش يطنش عليك من بعيد؟
الليبين زى بعضنا ...نحبوا التقصقيص وتقيد الاحوال ...يقولك انت منين :
كان قتله شرقاوى...يقول هذا اكيد مصري...
كان قتله غرباوى ...يقول هذا اكيد تونسي...
كان قتله من الجنوب ...يقول هذا اكيد تشادى ...
فى السبعينات من القرن اللى فات فى السوق المحلى فى سبها فيه شايب بهلول .. يلبس فى كبوط عسكري قديم وبوط عسكري فى عز الصيف ويقف فى وسط السوق .. ويقول والله يا ليبيين يا جاياتكم ايام سود ...وانشالله ربى ما يحضرني هالأيام ؟
جن الأيام السود وربى استجاب دعاءه واخد امانته..
جوا فروخ الحرام ولعبوا فى البلاد وجاء الحظ العطيب؟
ما فيه صاحب غير الكلاشن... وما فيه رفيق غير السجارة وما فيه عدو غير الحظ العطيب؟
