🔴 لو لسه متعرفش، المكسيك والعة دلوقتي وبتخوض حرب شوارع ضخمة والناس مش قادرة تخرج من بيوتها والمطارات والحدود مقفولة... وكل ده بسبب مقتل أخطر وأشرس زعيم عصابة مخدرات في العالم!
طب أيه اللي حصل بالظبط؟ وليه الدنيا هناك ولعت بالشكل ده؟ خليني أحكيلك الحكاية من أولها 👇
🟢 القصة بتبدأ من يومين كده، في وسط منطقة غابات في غرب المكسيك اسمها "تابالبا"، ودي منطقة معروفة بجمالها وكبائنها الخشبية، لكنها في نفس الوقت كانت الحصن السري لـ "نيميسيو أوسيجويرا سيرفانتس"، الشهير بـ "إلـ مينتشو"، زعيم كارتيل "خاليسكو الجيل الجديد" (CJNG)...
وفجأة وفي قلب الليل، في وسط ما الناس نايمين، قوات خاصة من الجيش المكسيكي والحرس الوطني، مدعومة بغطاء جوي ومعلومات استخباراتية من أمريكا، هجمت على المخبأ.. وحصل اشتباك عنيف بالرصاص بينهم وبين العصابات، وانتهى بمقتل 4 من رجال العصابة، وإصابة "إل مينتشو" إصابة قاتلة مات بعدها وهو في الطريق للمستشفى في مكسيكو سيتي!
🔵 وعشان تبقى فاهم بس، عايز أقولك ان الجيش لما دخل المكان لقى ترسانة سلاح مرعبة مش موجودة عند جيوش نظامية في بعض الدول... عربيات مصفحة، وقاذفات صواريخ قادرة تسقط طيارات، وقنابل يدوية وقنابل شديدة التفجير وأسلحة اوتوماتيكية وبلاوي زرقاء..
يعني إحنا هنا مش بنتكلم عن شوية بلطجية ولا تجار مخدرات عاديين، إحنا بنتكلم عن جيش نظامي موازي!
🔸️ فـ طبعًا انت متخيل بقى أيه اللي حصل لما العصابة دي وصلهم خبر إن زعيمهم مات...
🟡 رد فعل الكارتيل على موت زعيمهم كان زلزال حرفيًا.. أول ما البيان الرسمي طلع، ومالحقش يكمل كام دقيقة، كانت بعدهم الفيديوهات المرعبة مغرقة السوشيال ميديا... أتوبيسات بتتحرق في وسط الميادين في مدينة "زابوبان"، وأعمدة دخان سودة مغطية سما "بورتو فالارتا" السياحية، وعصابات ملثمة بتنزل الناس من عربياتهم وتولع فيها عشان يقفلوا الطرق قدام الجيش!
حاكم ولاية خاليسكو، "بابلو ليموس"، فورًا أعلن حالة طواريء في الولاية، اللي هي بيسموها "كود رِد" (الرمز الأحمر)، وبعدها المنطقة كلها دخلت في شلل تام... المواصلات كلها وقفت، وكل الفعاليات السياحية اتلغت، والناس اتحبست كلها في بيوتها..
🟣 حتى مطار "جوادالاخارا" الدولي (اللي هيستضيف ماتشات كاس العالم السنة دي) بقى ساحة رعب والناس بتجري فيه من كتر الإشاعات عن هجمات انتقامية... وبالفعل العصابة هجمت على المطار وقفلته تمامًا...
ودلوقتي أمريكا طلعت تحذير رسمي لرعاياها انهم يلزموا أماكنهم وميخرجوش، عشان لو العصابة دي شافت أي شخص أمريكي في الشارع، هيكون آخر يوم في عمره...
🟠 طب ثواني كده بس... هو ليه "إلـ مينتشو" ده كان مرعب للدرجة دي، وليه العصابات بتاعته بتعمل كل ده ضد الجيش المكسيكي نفسه؟
الراجل ده يا صديقي مكانش مجرد تاجر مخدرات، ده بنى إمبراطورية بمليارات الدولارات وليها فروع في أكتر من 40 دولة ومسيطرة على 27 ولاية في المكسيك، وبتنافس بشكل مباشر كارتل "سينالوا"، اللي هي أكبر منظمة إجرامية مكسيكية لتجارة المخدرات في العالم تقريبًا!
🟢 كارتيل "خاليسكو" تحت قيادة الراجل ده اتحولت لمدرسة في الإجرام المتطور... تخيل ان شوية العصابات دول بيستخدموا درونات مفخخة وألغام أرضية وعربيات مصفحة ومدرعات أقرب للدبابات... واقتصادهم مش واقف بس على المخدرات، دول داخلين في مناجم الدهب، وخشب الغابات، وتجارة الأفوكادو، وحتى عمليات النصب العقاري الدولية!
قوتهم وصلت لمرحلة انهم بيتحدوا الدولة والجيش نفسه، وفي 2020 حاولوا يغتالوا مدير أمن العاصمة في قلب مكسيكو سيتي بأسلحة تقيلة وقنابل، في عملية كانت أقرب لمشاهد حروب العصابات في الأفلام كده، والصحافة كانت قالبة الدنيا عليها في وقتها...
🔹️ طب السؤال هنا: ليه العملية دي تم تنفيذها دلوقتي بالذات؟!
الموضوع باختصار وببساطة له علاقة مباشرة برجوع دونالد ترامب للبيت الأبيض.. زي ما انت عارف، ترامب بقاله فترة بيضغط بكل قوته على حكومات أمريكا اللاتينية، ومعاهم كمان الحكومة المكسيكية، وهدد قبل كده بعمل عسكري أمريكي مباشر ضد الكارتيلات المكسيكية اللي وصفها بـ "الإرهابية"، وكان عايز ياخدها ذريعة للهجوم على المكسيك...
🟡 وعشان كده العملية دي خططتلها رئيسة المكسيك عشان تبقى زي هدية كده تقدمها لواشنطن عشان تهدي اللعب مع المجنون البرتقالي، حتى لو هتتسبب في مصيبة وحرب شوارع وعصابات عندها في البلد... بس عشان الخيار التاني أسوأ بما لا يقاس، ولك في ما حصل في فنزويلا عبرة...
وفعلاً، الخارجية الأمريكية طلعت بيان من شوية وصفت فيه اللي حصل ده بـ "الانتصار العظيم للعالم"، وإدارة ترامب دلوقتي بتسوقله على انه انتصار أمني كبير على العصابات المنظمة... لكن الخوف كله من اللي جاي...
🟣 التاريخ بيقول إن لما الرأس الكبيرة لأي عصابة بتقع، الكارتيل بيتفتت لـ 100 عصابة صغيرة، وده معناه حروب شوارع وتصفيات مالهاش آخر هتولع المكسيك كلها وهتقلبها رأسًا على عقب، وده اللي بالفعل بدأ يحصل في الساعات الأخيرة...
دلوقتي في ملايين الناس في غرب المكسيك قاعدين في البيت ورا الشبابيك، بيسمعوا صوت السارينات وضرب النار، ومستنيين يشوفوا هل الدنيا هتعدي والجيش هيسيطر، ولا دي مجرد بداية لحرب شوارع هتولع في البلد كلها... وكل ده عشان يرضوا عنهم البرتقالي المجنون...
#علام
